فلسطيني متحكيش

فلسطيني... متحكيش!!


قالولك اسكت متحكيش..
انت خلقت للتطنيش

للحواجز.. للمعابر.. للتفتيش

كتبوا على جبينك ينداس..
من الضابط.. للشاويش

فلسطيني.. قالولك ممنوع تعيش...


فلسطيني ممنوع تثور..
ومش مسموح تكون مقهور

إياك تطالب بحقك..
اوعى بيوم تشوف النور

ممنوع تجدد هوية..
ممنوع تجدد بسبور

فلسطيني وبدك تتعلم..
هاي شغلة ضد الدستور!!

فلسطيني لازم تتألم..
من دون ما يشوفك دكتور!!

فلسطيني ممنوع تتظلم..
ولا يطلع بجناحك ريش
فلسطيني.. ممنوع تعيش...


فلسطيني بكل المطارات..
اسمك بالأحمر مكتوب

وعلى شباك مصلحة الجوازات..
كتبوا على جبينك مطلوب

لازم تتوقف ساعات..
مذنب.. أو من دون ذنوب

ويتوجه الك اتهامات..
انك سبب كل الحروب!

كأنو بسببك الحق مات..
والعدل بأرضك مسلوب!

كأنك سبب النكسات..
وكل أزمات الشعوب!

كأنو بسببك مجرم فات..
على جنين بلحظة غروب...

ذبح صبيان وبنات..
وعجّز.. على أمرها مغلوب


مع انه الحقيقة..

أنا الي بالدنيا ضحية

عملتوني مادة للغنى..
وقضية للي ما عندو قضية

أنا الي راسي ما انحنى..
بوجه الريح القوية

أنا الي شعبي صمد..
بالضفة.. وبالرشيدية

أنا الي شعبي انتفض..
وبحجرحارب دورية

ولليوم وبكرة وللأبد..
عنا كلمة وحدة.. هي :

فلســـــــــطيني وأفتخر